Ansible Content Navigator

Salam dostlar,

Bu məqaləmdə “Ansible Content Navigator” (ACN) haqqında nəzəri məzmunu əhatə edən mövzu barəsində bəhs edəcəm. Beləliklə:

“Ansible Content Navigator” (ACN) “ansible” ekosistemində “playbook”, rol və moduların kolleksiyasına nəzarət və bu kolleksiyanı idarə edərək infrastrukturun avotmatlaşdırılması istiqamətində olan məzmunun (content) aşkarlanmasını asanlaşdırır, eləcə də istifadəçi dostu (user friendly) interfeysi və mərkəzləşdirməni təmin edir. “Ansible Content Navigator” həmçinin “Ansible Navigator” (AN) da adlandırılır ki, “ansible-playbook”, eləcə də digər “ansible-*” əmrlər toplusu və utilitlərini əvəz etdiyini düşünə bilərik. Ümumi olaraq qeyd etsək, “AN” zənginləşdirilmiş əmrlər xətti (command-line tool) və mətn əsaslı istifadəçi interfeysi (text-based user interface/TUI) vasitəsilə “ansible content”, sənədləşmə (documentation), “inventory”, “playbook”, kolleksiya, və konteyner “image”-lərin yaradılması, nəzarət edilməsi, işə salınması, nasazlıqların aradan qaldırılması (troubleshooting) və s. təmin edir.

“Ansible Content Navigator”-un əsas xüsusiyyətləri:

• Mərkəzləşdirilmiş məzmun anbarı (Centralized Content Repository)  

“ACN” “playbook”, rol, modul və “plugin” kimi bütün “ansible” məzmununun (content) saxlandığı və kateqoriyalara bölündüyü mərkəzləşdirilmiş “repository” kimi çıxış edir;

• Axtarış və naviqasiya (Search and Navigation)

İstifadəçilər açar söz, teq və ya digər “metadata”-dan istifadə edərək xüsusi məzmunu səmərəli şəkildə axtarış edə bilərlər ki, bu da müvafiq avtomatlaşdırma resurslarının tapılmasını asanlaşdırır;

• Versiyaya nəzarət inteqrasiyası (Version Control Integration)

“Git” kimi versiyaya nəzarət sistemləri ilə inteqrasiya olunaraq versiya dəyişikliklərini izləməyə və həmin versiyaları idarə etməyə imkan verir;

• Fərdi “metadata” və etiketləmə (Custom Metadata and Tagging)

“ACN” istifadəçilərə məzmunu (content) kateqoriyalara ayırmaq üçün fərdi “metadata” və teqlər əlavə etməyə imkan verir ki, bu da məlumatların asan şəkildə əldə olunmasını təmin edir;

• “Role-Based Access Control” (RBAC)

Yalnız səlahiyyətli və imtiyazlı istifadəçilərin xüsusi məzmuna daxil ola, dəyişdirə bilməsini və ya icra etməsini təmin edir.

“ACN”-nin “stdout” və “text-based user interface” (mətn əsaslı istifadəçi interfeysi tipli) iki rejimi (mode) mövcuddur:

• “Stdout” rejimi

Bu rejimdə “ACN” standart əmr xətti (standard command-line) interfeysinə bənzər şəkildə işləyir. Belə ki, “ACN” mövcud “ansible” əmrlərinin və əlavələrinin (extensions) əksəriyyətini birbaşa əmr xəttində qəbul edir, istifadəçilərə əmrləri icra etməyə, “playbook”-ları işə salmağa, konfiqurasiyaları idarə etməyə və müxtəlif “ansible” tapşırıqlarını (task) yerinə yetirməyə imkan verir;

• “Text-based user interface” (TUI) rejimi

Bu rejim “ansible” əmrləri və əlavələrinin (extensions) əksəriyyətinin deyil, hamısının imkanlarını artıran interaktiv, mətn əsaslı interfeysi təmin edir. Bu rejim, “stdout” rejimindən fərqli olaraq standart əmr xətti interfeysi (standard command-line) ilə müqayisədə daha zənginləşdirilmiş və interaktiv imkanları təmin etməklə artefakt fayllardan istifadə edərək məzmunu (content) analiz etməyə, “playbook”-ları işə salmağa və “playbook”-larda olan nasazlıqları (troubleshooting) aradan qaldırmağa imkan verir.

İndi isə “AN” ilə bağlı bəzi əmrləri nəzərdən keçirək:

“ansible-navigator collections” - bu əmr “ansible” mühitində mövcud kolleksiyaları araşdırmaqda kömək edir;

“ansible-navigator collections --help” - bu əmr mövcud kolleksiyaları və onların məzmununu (content) nümayiş etdirərək “ansible” kolleksiyalarında axtarış və idarə etmə üçün ətraflı təfərrüatlar və bəzi seçimləri təqdim edir;

“ansible-navigator config” - bu əmr cari “ansible” konfiqurasiya parametrlərini araşdırmaqda kömək edir;

“ansible-navigator config --help” - bu əmr “ansible” mühitində cari konfiqurasiya parametrlərinə baxmaq və dəyişdirmək imkanı verən bəzi seçimləri təqdim edir;

“ansible-navigator doc” - bu əmr xüsusi “ansible” modulu və ya "plugin" üçün sənədləri nəzərdən keçirməyə imkan verir;

“ansible-navigator doc --help” - bu əmr “ansible” modulu və ya “plugin” üçün sənədlərə daxil olmaq imkanı verərək onların istifadəsi, parametrləri və funksiyaları haqqında ətraflı məlumatı təqdim edir;

“ansible-navigator images” - bu əmr “ansible” mühitində “image”-ləri araşdırmaqda kömək edir;

“ansible-navigator images --help” - bu əmr “ansible” mühitində istifadə oluna bilən “image”-ləri anlamaqda bələdçilik edir;

“ansible-navigator inventory” - bu əmr “ansible” mühitində “inventory”-ni araşdırmaqda və onlarla qarşılıqlı əlaqəni təmin etməkdə köməklik edir;

“ansible-navigator inventory --help” - bu əmr “ansible” mühitində inventarlara baxmaq, idarə və manipulyasiya etmək kimi funksiya, eləcə də “inventory” konfiqurasiyalarını yoxlamaq və dəyişdirmək üçün seçimləri təqdim edir.

Son olaraq qeyd edim ki, yuxarıdakı əmrlər əlavə seçimlər və ya parametrlər olmadan istifadə edildikdə, "ACN"-nin mətn əsaslı interfeysi daxilində kolleksiyaları (collections), tənzimləmələri (configs), sənədləri (docs), "images" və "inventory"-ləri interaktiv şəkildə araşdırmaq imkanı mümkün olur.

Dostlar,

Güman edirəm ki, bu məqaləm də digər məqalələrim kimi faydalı olar.

Təşəkkür edirəm

Hörmətlə,

Müəllif

Araz Əhmədov